écouter Jean Bretel Jean de Grievilier : Jeu parti « Grieviler, un jugement Me faites de deus maris : Li qels a plus de tourmens, U chieus ki cuide toudis Que sa feme aint et qu’ele soit amee, Mais n’en set nient, se çou n est pas pensee, U cil ki set que sa feme a amé Et que ses amis a sa volenté L’eut maintes fois mais fourjuree l’a, Et seurs est que jamais n’avenra ?   — Sire Bretel, erroment Vous en sera li voirs dis. Cil a cuer dolent souvent Qui de sa feme est tous fis K’ele a esté par autrui violee, Mais sa dolours est aukes trespassee ; Je di que chu a trop plus de griété Ki adés a en cuer et en pense Ke sa feme aint : ja dolour ne morra En cuerjalous tant coum’ il le savra. — Grieviler, mauvaisement Savésjugier, ce m’est vis. Voirs est que grant dolour sent Cuers jalous, mais cent tans pis A cil ki set k’il a honte prouvee ; La vergoune est adés renouvelee De viés pecié ; cil qui n’a riens prouvé Se repent bien qant il a tant dasé En sa folie, et sa dolours tresva ; Mais cil qui set ne l’oublïera ja. — Sire, sachiés vraiement Que jou n’ai de riens mespris ; Bien dirai raison coument Lijalous est plus maris. Jalous n’a pais ne soir ne matinee ; D’ire a toustans la cervele escaufee ; Il n’a en lui nul point de fermeté ; Toutans cuid’ il c’on li ait tout emblé. Tel mal n’a pas li wihos qui piecha Fu et bien set que mais n’i enkerra. — Jehan, trop plus cruelment Est tourmentés et hounis Cil qui tout certainement Set k’il fu wihos jadis ; A tous jours mais en harra s’espousee ; En haant ert sa dolour demenee. Mais li jalous mescroit par amisté ; Jalousie vient de fine chierté ; Ja amoureus tourment ne grevera Tant con cil qui de haïne venra. — Bretel, nus maus ne se prent Ajalous ; bien est trais Li hom ki teus maus souprent. Toustans a le cuer espris D’ire et d’anui et de paour dervee. Li jalous boit par an mainte orde euwee, Mais li wihos a le mal pas passé Puis qu’il voit bien et est en seurté Que sa feme mais autrui n’amera. Par tant dijou que li jalous pis a. — Robert amis, çou c’on set est outré, Mais en cuidier n’a fors que vanité. Li viés ferus plus se gramïera Que li nouviaus manechiés ne fera. — Jaket, on doit mieus tenir a navré Lejalous cuer que le wiot sané : Maus trespassés ja tant ne se daurra Coume chil fait qui tout adés tenra. » Vers l'index Retour Vers l'accueil