écouter Moniot de Paris Chant de rencontre Je chevauchoie l'autrier Seur la rive de la Saine. Dame dejoste un vergier Vi plus blanche que laine ; Chançon prist a commencier Souef, a douce alaine. Mult doucement li oï dire et noter : "Honi soit qui a vilain me fist doner !" J'aim mult  melz un poi de joie a demener Que mil mars d'argent avoir et pluis plorer Hautement la saluai De Dieu le filz Maris. El responi sanz delai : "Jhesu vos beneïe !" Mult doucement li proié Q'el devenist m'amie. Tot errant me commençoit à raconter Conme ses maris la bat por bien amer. J'aim mult melz un poi de joie a demener Que mil mars d'argent avoir et pluis plorer "Dame, estes vos de Paris ? — Oïl, certes, beau sire ; Seur Grant-Pont maint mes maris, Des mauvés tot le pire. Or puet il estre marris : Jamés de moi n'iert sire! Trop est fel et rioteus, trop puet parler, Car je m'en vueil avec vos aler joër." J'aim mult  melz un poi de joie a demener Que mil mars d'argent avoir et pluis plorer "Mal est qui me maria! Tant en ait or le prestre, Qu'a un vilain me dona Felon et de put estre. Je croi bien que poior n'a De ci tresqu'a Vincestre. Je ne pris tot son avoir pas mon souler, Quant il me bat et ledenge por amer." J'aim mult melz un poi de joie a demener Que mil mars d'argent avoir et pluis plorer "Enondieu, je amerai Et si serai amee, Et si me renvoiserai El bois soz la ramee, Et mon mar maudirai Et soir et matinee. — Dame de Paris, amez, lassiez ester Vostre mari, si venez o moi jöer !" J'aim mult melz un poi de joie a demener Que mil mars d'argent avoir et pluis plorer

écouter Moniot de Paris Chanson d'amour Quant je oi chanter l’alöete Pour la venue du tens cler, Lors mi semont une amorete De chançon fere et de chanter D’une pucelete Ferai chançonete Qui mult est sadete. Je l’aim sanz fausser. Bele a la bouchete, Color vermeillete ; Tant la voi sadete Que n’i puis durer. Or voi je bien que sanz morir Ne porrai ces maus endurer ; S’ele mi let ensi fenir, Toutlimons l’en devroit blasmer.   A dolor userai ma vie Se cele n’a merci de mi Que je ai si lonc tens servie, Qu’ele mi tiengne pour ami. Je ne vivrai mie S’ele n’est m’amie, Mes a grant haschie Me morrai ensi. Se muir por s’aïe, Jamés n’iert qui die Chançon renvoisie Pour l’amor de li. Or voi bien que mar acointai Son cors, s’el n’a merci de mi. Sa grant biauté mar remirai ; Je m’en tieng bien a maubailli. Oncor tenir ne mi porroie De chanter com loiaus amis. Je chant et plorer deveroie Conme dolenz et esbahiz. Se cele n’est moie Laou mes cuers s’otroie, Faillie est ma joie Et touz mes deliz ; Et Deus, qui g’en proie, Dont qu’ele soit moie Si c’oncore en soie Joianz etjohis. Jehan Moniot dit ensi Q’il a en tel lieu son cuer mis Laou il a bien du tout failli. Gardez que ne faciez ausi ! Vers l'index Retour Vers l'accueil