Thibaut, Comte de Champagne Jeu-Parti Dame, merci, une rien vos demant. Dites me voir se Dex vos beneïe, Quant vos morrez et je, mais c'iert avant, Car après vos ne vivroie je mie, Qua devanra Amors, cele esbahie, Qui tant avez sens, valour, et j'aintant Que je croi bien qu'après nos iert faillie. — Par Deu, Thiebaut, selonc mon esciant Amors n'iertja por nul mort perie, Ne je ne sai se vos m'alez guilant, Que trop maigres n'estes encore mie. Quant nous morrons (Dex nos doint bone vie) Bien croi qu'Amors domage i aura grant Mais touz jors iert valors d'Amors complie. — Dame, certes ne devez pas cuider, Mais bien savoir que trop vos ai amée. De la joie m'en aing plus et toing chier Et por ce ai ma graisse recovrée, Qu'ainz Dex ne fist si tres bele riens nee Con cos, ma Dame, mout me fait esmaier Quant nos morrons qu'Amors sera finee. — Thiebaut, taisiez, nus ne doir comencier Raison qui soit de touz droiz desevree. Vos le dites por moi amoloier En contre vos que tant avez guilee. Je ne di pas, certes, que je vous hee, Mais se d'Amors me covenoit jugier E le seroit servie et honoree. — Dame, Dex doint que vous jugiez adroit, Et connoissiez les max qui me font plaindre, Que bien saiquelx que li jugemenz soit, Se je en muir Amours covient a faindre Se vos, Dame, ne le faites remaindre Dedans son leu arriers ou ele estoit, Qu'a vostre sen ne porroit nuns ateindre. Envoi Thiebaut, s'Amors vos fait por moi destraindre Ne vos griet pas, que, se amer n'estoit. J'ai bien un cuer qui ne se sauroit faindre. écouter

écouter Thibaut, Comte de Champagne Chanson pieuse Deus est ensi conme li pellicans, Qui fait son ni et plus haut arbre sus ; Et li mauvais oisiaus, qui vient de jus, Ses oisellons ocit, tant est puanz Lï peres vient destrois et angoisseus. Dou bec s’ocit ; de son sanc dolereus Vivre refait tantost ses oisellons. Deus fist autel quant fu sa passions ; De son douz sanc racheta ses enfans Dou deable, qui muit estoit puissanz. Li guerredons en est mauvais et lens, Que biens ne drois ne pitiés n’a mes nus ; Ainz est orgueils et baraz au dessus, Felonie, traïsons et beubans. Mult par est or nostre estat perillous, Et se ne fust li essamples de ceus Qui tant aiment et noises et tençons Ce est des clers qui ont laissié sarmons Por guerroier et por tüer les gens Jamés en Dieu ne fust nus hons creans. Nostre chief fait touz noz menbres doloir, Por c’ est bien drois qu’a Dieu nos en plaignons, Et grant corpe ra mult seur les barons, Qui il poise quant aucuns veut valoir ; Et entre gent en font mult a blamer Qui tant sevent et mentir et guiller. Le mal en font deseur els revenir ; Et qui mal quiert, mal ne li doit faillir. Qui petit mal porchasse a son pooir, Li grans ne doit en son cuer remanoir. Bien devrions en l’estoire veoir La bataille qui fu des deus dragons, Si com l’en trove el livre des Bretons, Dont il covint les chastiaus jus cheoir : C’est cis siecles, qui il covient verser, Se Deus ne fet la bataille finer. Le sens Mellin en covint fors issir Por deviner qu’estoit a avenir; Mes Antecriz vient, ce poez savoir, As maçues qu’Anemis fait mouvoir. Savez qui sont li vil oisel punais Qui tuent Dieu et ses enfençonez ? Li papelart, dont li mons n’est pas nez. Cil sont puant, ort et vil et mauvais ; Il ocïent toute la sinple gent Par lor faus moz, qui sont li Dieu enfant. Papelart font le siecle chanceler ; Par saint Pierre, mal les fait encontrer ! Il ont tolu joie et solas et pais Cil porteront en enfer le grief fais. Or nos doint Deus lui servir et amer Et la dame c’on ne doit oublier, Qui nos vueille garder a touz jors mais Des puz oiseaus qui ont venin es bes.

écouter Thibaut, Comte de Champagne Chanson pieuse Mauvez arbres ne puet florir, Ami. seche toz et va crolant ; Et hom qui n’aime, sanz mentir, Ne porte fruit, ami va morant. Fleur et fruit de comte semblant Porte cil en qui naist amors. En ce fruit a tant de valors Que nus nel porroit esligier, Que de toi maus ptuet allegier. Fruit de nature l’apele on ; Or vos ai devisé son non. De ce fruit ne puet nus sentir, Se Dieus ne le fait proprement. Qui a Dieu amer et servir Doue cuer et cors et talent, Cil queut don fruit trestot avant, Et Dieus l’en fait riche secors. Par le fruit fu li premiers plors, Quant Eve fist Adan pechier ; Mes qui dou bon fruit veut mengier Dieu aint et sa mere et son non, Cil quiaudra le fruit de saison. Seignor, de l’arbre dit vos ai De nature, de qu’amours vient ; Du fruit meur conté vos ai Que cil quiaut qui a Dieu se tient. Mes du fruit vert me resovient Qui ja en moi ne meûrra ; C’est li fruiz en qu’Adans pecha. De ce fruit est plains mes vergiers Des que madame vi premiers, Oi de s’amor plain cuer et cors, Ne ja nul jor n’en istra fors. Bien cuit doit fruit ne gosteré Que je cueilli, ainçois m’avient Si com a l’enfant, bien le sé, Qui a la branche se sostient Et entor l’arbre va et vient Ne ja amont ne montera ; Ainsi mez cuers foloiant va. Tant par est granz mes desirriers Que je en tieng mes grans maus chiers, Si sui afinez com  li ors Vers li, cui est toz mes tresors. Dieus, se je pooie cueillir Du fruit meur de vos amer Si com vos m’avez fait sentir L’amor d’aval et comparer, Lors me porroie saouler Et venir a repentement. Par vostre douz commandement Me donez amer la meillor : Ce est la precieuse flor Par qui vos venistes ça jus, Dont li deables est confus. Mere Dieu, par vostre douçor Dou hon fruit me donez savor, Que de l‘autre ai je senti plus C’omiques, ce croi, ne senti nus. Vers l'index Retour Vers l'accueil

écouter Thibaut, Comte de Champagne Chanson de croisade Seignor, saichiés qui or ne s’en ira En cele terre ou Deus fu mors et vis Et qui la crois d’outremer ne penra A paines mais ira en paradis. Qui a en soi pitié ne ramembrance Au haut Seignor doit querre sa venjance Et delivrer sa terre et son pais. Tuit li mauvés demorront par deça, Qui n’aiment Dieu, bien ne honor ne pris Et chascuns dit : « Ma fame que fera ? Je ne lairoie a nul fuer mes amis. » Cii sont cheoit en trop foie atendance, Qu’il n’est amis fors que cil, sanz doutance Qui por nos fu en la vraie crois mis. Or s’en iront cil vaillant bacheler Qui aiment Dieu et l’eunor de cest mont, Qui sagement vuelent a Dieu aler ; Et li morveux, li cendreux demorront ; Avugle sunt, de ce ne dout je mie. Qui un secors ne fait Dieu en sa vie Et por Si pou pert la gloire dou mont. Dieus se lessa en crois por nos pener Et nos dira au jor que tuit vendront: « Vos qui ma crois m’aidastes a porter Vos en irez la ou mi angle sont ; La me verrez et ma mere Marie. Et vos par cuije n’oi onques aïe Descendrés tuit en enfer le parfont. » Chascuns cuide demorer toz haitiez Et que jamés ne doie mal avoir ; Ainsi les tient Anemis et pechiez Que il n’ont sen, hardement ne pooir. Biaus sire Dieus, ostés leur tel pensee Et nos metez en la vostre contree Si saintement que vos puissons veoir ! Douce dame, roïne coronee, Proiez por nos, virge bien aüree ! Et puis aprés ne nos puet mescheoir

Thibaut, Comte de Champagne Pastourelle J’aloie I’autrier errant Sanz compaignon Seur mon palefroi pensant A fere une chançon Quant j’oï, ne sai conment, Lez un buisson La voiz du plus bel enfant C’onques veïst nus hon ; Et n’estoit pas enfes, si N’eüst quinze anz et demi, N’onques nule riens ne vi De si gente façon. Vers li m’en vois maintenant, Mis l’a reson « Bele, dites moi conment, Pour Dieu, vous avez non.» Et ele saut tout errant A son baston : « Se vous venez plus avant, Ja avroiz la tençon. Sire, fuiez vous de ci! N’ai cure de tel ami, Car j’ai mult plus biau choisi, Qu’en claime Robeçon. » Quant je la vi esfreer Si durement Qu’el ne mi daigne esgarder Ne fere autre senblant, Lors conmençai a penser Confaitement EIe me porroit amer Et changier son talent. A terre lez li m’assis ; Quant plus regart son cler vis, Tant est plus mes cuers espris, Qui double mon talent. écouter Lors li pris a demander Mult belement Que me daignast esgarder Et fere autre senblant. Ele conmence a plorer Et dist itant « Je ne vos puis esgarder, Ne sai qu’alez querant. » Vers li me trais, si li di : « Ma bele, pour Dieu, merci ! » Ele rist, si respondi : « Nou faites pour la gent. » Devant moi lors la montai De maintenant Et trestout droit m’en alai Vers un bois verdoiant. Aval les prez regardai, S’oï criant Deus pastors parmi un blé Qui venoient huiant Et leverent un haut cri. Assez fis plus que ne di ; Je la les, si m’en foi N’oi cure de tel gent.

Thibaut, Comte de Champagne Pastourelle L’autrier par la matinee Entre un bois et un vergier, Une pastore ai trovee Chantant por soi envoisier, Et disoit en son premier « Ci me tient li maus d’amours. » Tantost cele part me tor Que je l’oï desresnier, Si hi dis sans delaier : « Bele, Deus vos doint bon jor. » Mon salu sanz demoree Me rendi et sanz targier ; Mult ert fresche, coloree, Si mi plot a acointier. « Bele, vostre amor vos quier, S’avrez de moi riche ator. » Ele respont : «Tricheor Sont mes trop li chevalier ; Melz aim Perrin mon bergier Que riche honme menteor. — Bele, ce ne dites mie. Chevalier sont trop vaillant. Qui set donc avoir amie Ne servir a son talent Fors chevalier et tel gent ? Mais l’amor d’un bergeron Certes ne vaut un bouton. Partez vos en a itant Et m’amez ; je vos creant, De moi avrés riche don. écouter — Sire, par sainte Marie, Vos en parlés por noient. Mainte darne avront trichie Cil chevalier soudoiant ; Trop sont faus et mal pensant, Pis valent que Guenelon. Je m’en revois en maison, Car Perrinés qui m’atent M’aime de cuer loiaument. Abaisiés vostre raison. » G’entendi bien la bergiere, Qu’ele me veut eschaper ; Muht li fis longue priere, Mais n’i poi riens conquester. Lors la pris a acoler Et ele gete un haut cri « Perrinet, traï! traï ! » Dou bois prenent a huper. Je la lez sans demorer, Seur mon cheval m’en parti. Quant ele m’en vit aler, Ele dist par ranponer : « Chevalier sont trop hardi. »

Thibaut, Comte de Champagne Chanson d'amour Ausi conme unicorne sui Qui s’esbahit en regardant Quant la pucele va mirant. Tant est liee de son ennui, Pasmee chiet en son giron ; Lors l’ocit on en traïson. Et moi ont mort d'autel senblant Amors et ma dame, pour voir ; Mon cuer ont, n’en puis point ravoir. Dame, quant je devant vos fui Et je vos vi premierement, Mes cuers aloit si tresaillant Qu’il vos remest quant je m’en mui. Lors fu menés sanz raençon En la douce chartre en prison, Dont li  piler sont de talent Et li huis sont de biau veoir Etli anel de bon espoir. De la chartre a la clef Amors, Et si a mis trois portiers Biau Semblant a non li premiers, Et Biautez ceus en fait seignors Dangier a mis a l’uis devant, Un ort felon, vilain puant, Qui mult est maus et pautoniers. Cist troi sont et viste et hardi ; Mult ont tost unhome saisi. écouter Qui porroit soufrir la tristors Et les assaus de ces huissiers ? Onqtues Rollans ne Oliviers Ne vainquirent si fors estors ; Il vainquirent en conbatant, Mais ceus vaint on humiliant. Soufrirs en est gonfanoniers, En cest estor dont je vos di, N’a nul secors que de merci. Dame, je ne dout mes riens plus Fors tant que faille a vos amer. Tant ai apris a endurer Que je sui vostres tout par us Et se il vos en pesoit bien, Ne m’en puis je partir por rien Que je n’aie le remenbrer Et que  mes cuers ne soit adés En la prison et de moi pres. Dame, quant je ne sai guiler, Merciz serait de saison mes De sotustenir si grevain fes. Vers l'index Retour Vers l'accueil