|
Anonyme
Tenson
"Trop sui d'amors enganez
Quant cele ne m'aime mie
A qui je me sui donez ;
Si fet trop grant musardie
Cuer qui a fame se fie
S'il n'en a grant seürtez,
Quar toz est muëz
Cuer de fame et tost tornés.
— Conpaign, ne vos esmaiez !
Lessiez ester la folie,
Car s'el ne vos veut amer,
Tost avres plus bele amie ;
Et s'el s'est de vos partie,
D'autretel gieu li jouez ;
Si vos en partez,
Car bien voi ja n'en jorés.
— Mauvés conseils me donés
De lessier si bele amie ;
Mon cuer a enprisoné,
Ravoir ne le pouroie mie.
Ainz vaintra sa felonie
Ma grant debonereté
Et ma loiauté,
Si serai amant clamé.
— Conpains, se tant atendez,
Dont vos est joie faillie.
Que de li soiez amez !
Il est bien honis qui prie,
Et su muert a grant haschie
Qui pent; autretel ferez,
Se tant atendez
Que de li soiez amez.
— Conpains, vos me ranponez,
Si fetes grant vilanie,
Quant départir me voulez
De ma douce conpaignie ;
C'est la riens ou plus me fie.
Je cuit que vos i baez,
Si me sui pensez
Que departir m'en voulés."
|
|
écouter |
|
|