|
Anonyme
Pastourelle
Hui main par un ajornant
Chevauchai ma mule anblant ;
Trouvai gentil pastorele et avenant ;
Entre ses aigniaus aloit joie menant.
La pastore mult m’agree,
Si ne sai dont cie est nee
Ne de quels parenz cie est enparentee ;
Onques de mes euz ne vi si bele nee.
« Pastorele, pastorele,
Vois le tens qui renouvele,
Que raverdissent vergiers et toutes herbes ;
Biau deduit a en vallet et en pucele. »
« Chevalier, mult m’en est bel
Que raverdissent prael,
Si avront assez a pestre mi aignel ;
Je m’irai soef dormir souz l’arbroisel. »
« Pastorele, car souffrez
Que nos dormons lez a lez,
Si lessiez voz aigniaus pestre aval les prez ;
Vos n’i avrois ja damage ou vous perdez. »
« Chevalier, par saint Simon,
N’ai cure de conpaignon ;
par ci passent Guerinet et Robeçon,
Qui onques ne me requistrent se bien non. »
« Pastorele, trop es dure,
Qui de chevalier n’as cure ;
A cinquante boutons d’or avroiz çainture,
Si me lessiez prendre proie en vo pasture. »
« Chevalier, se Deus vos voie,
Puis que prendre voulez proie,
En plus haut lieu la pernez que ne seroie ;
Petit gaaignerïez et g’i perdroie. »
« Pastorele, trop es sage
De garder ton pucelage ;
Se toutes tes conpaignetes fussent si,
Plus en alast de puceles a mari. » |
|
|