écouter Blondel de Nesle Chanson d'amour Se savoient mon tourment Et auques de mon afaire Cil qui demandent conment Je puis tant de chançons faire, Il diroient vraiement Que nus a chanter n'entent Qui mieuz s'en deüst retraire ; Maiz pour ce chant seulement Que je muir pluz doucement. Trop par me grieze forment Que cele est si debonaire Qui tant de dolour me rent Ce qu'a tout le mont doit plaire ; Maiz ne me grevast nïent, Se la tres bele au cors gent Me feïst touz ces maus traire. Maiz ce m'ocit vraiement Qu'el ne set que pour li sent. Se seüst certeinnement Mon martire et mon contraire Cele por qui je consent Que l'amour me tient et maire, Je croi bien qu'alegement M'envoiast procheinnement ; Quar par droit le deüst faire, Se reguars a escïent De ses biaux ieus ne me ment. Chançons, va isnelement A la bel au cler viaire, Si li di tant seulement : Qui de bons est, souëf flaire. Ne l'os prier autrement, Quar trop pensai hautement, Si n'en puis mon cuer retraire. Et se pitiez ne l'en prent, Blondiaus muert, que pluz n'atent. écouter Blondel de Nesle Chanson d'amour En tous tens que vante bise, Pour cele dont sui soupris, Qui n'est pas de moi souprise, Devient mes cuers noirs et bis. De fine amour l'ai requise, Qui cuer et cors m'a espris, Et, s'ele n'en est esprise, Pour mon grant mal la requis. Mais la douleurs me devise Qu'a la meilleur me suis pris Qui ainc fust en cest mont prise, Se j'estoie a son devis. Tort a mon cuer qui s'en prise, Quar ne sui pas si eslis. S'ele eslit, qu'ele m'eslise! Trop seroie de haut pris. Et nequedent destinee Doune a la gent maint pensé : Tost i metra sa pensee S'amours li a destiné. Je vi ja tel dame amee D'ome de bas parenté Qui mieuz ert emparentee, Et si l'avoit bien amé. Pour c'est drois, s'Amours m'agree, Que mon cuer li ai douné. Se l'amour ne m'a douné, Tant la servirai a gré, S'il plaist a la desirree, Que un baisier a celé Avrai de li a celee, Que tant ai desirré.

Blondel de Nesle Chanson d'amour Cuer desirrous apaie Douçours et confors, Etjou d’amours veraie Sui en baisant mors. S’encor ne m’est autres dounez, Mar fui onques de li privez A morir sui livrez Se trop le me delaie. Privez baisiers est plaie D’amours dedenz cors ; Mout m’angoisse et esmaie, Si ne pert dehors. Ha, las! pour quoi m’en sui vantez, Quant ne m’en puet venir santez Se ce dont sui navrez Ma bouche ne rassaie ? Amours, vous me feïstes Mon fin cuer trichier, Qui tel savour meïstes En son douz baisier. A morir li avez apris Se pluz n’i prent qu’il i a pris, Dont m’est il bien avis Qu’en baisant me trahistes. écouter Certes, mout m’atraisistes Juene a cel mestier, N’ainc nului n’i vousistes Fors moi engignier. Je suis hi plus loiauz amis Cui onques fust nus biens pramis. Hé las! tant ai je pis! Amours, mar me nourristes. Se je Dieu tant amaisse Com je fais celi Qui  si me painne et lasse, J’eüsse merci ; Qu’ainc amis de meilleur voloir Ne la servi pour joie avoir Com je fais tout pour voir Sanz mente et sanz grasse. Se de faus cuer proiaisse Dont je ne la pri, Espoir je recouvraisse, Maiz n’est mie einsi ; Neja Dieus ne me doint voloir De hi deçoivre sanz doloir. Ce me tient en espoir : Qu’Amours blece et respasse. Vers l'index Retour Vers l'accueil